ខេត្តស្ទឹងត្រែង ជាខេត្តមួយក្នុងចំណោមខេត្តបីផ្សេងទៀត ដែលមានភូមិសាស្ត្រស្ថិតនៅប៉ែកខាងជើង តំបន់ភូមិភាគ​ឦសាន ​ នៃផ្ទៃប្រទេសកម្ពុជា។ ខេត្តស្ទឹងត្រែងមានទីតាំងនៅខ្ពង់រាបតាមបណ្តោយដងទន្លេមេគង្គដែលប្រសព្វជាមួយទន្លេសេកុង។ ខេត្តនេះមានបណ្តោយ ៤៥០​គ.ម​​ ដោយធ្វើដំណើរតាមផ្លូវជាតិលេខ៧ (ភ្នំពេញ-ស្ទឹងត្រែង ៤៥០ គ.ម)។  មានព្រលានយន្តហោះដែលជាសក្តានុពលដល់ការរៀបចំផ្លូវអាកាស ។ ខេត្តស្ទឹងត្រែង មានព្រំប្រទល់ ៖ ខាងលិចជាប់ខេត្តព្រះវិហារ នឹងខេត្តកំពង់ធំ ខាងកើតជាប់ខេត្តរតនគិរី ខាងត្បូងជាប់ខេត្តក្រចេះ និងខាងមណ្ឌលគីរី និងខាងជើងជាប់ប្រទេសឡាវ។ ខេត្តនេះមានក្រុង ១ ស្រុកចំនួន ៦ សង្កាត់ចំនួន ៤ ឃុំចំនួន ៣០ និងភូមិចំនួន ១២៨ភូមិ ។

          ផ្ទៃដីសរុប ១២០១៦ គ.ម ក្នុងនោះផ្ទៃដីដាំដុះមានចំនួន ៤៨ ១២៦ ហិកតា (ស្រូវសន្ទួង ពង្រោះ ចម្ការ ដំណាំសាកវប្បកម្ម និងដំណាំឧស្សាហកម្ម) ហើយមានប្រជាជនសរុប ១៦៤ ៥៩៨ នាក់ ក្នុងនោះស្រ្តី ៨២ ៣១៨នាក់ ស្មើនឹង ៣៩ ៣៨៧ គ្រួសារ​ ដែលប្រជាជនចំនួន ៨០% នៃប្រជាជនសរុប ប្រកបមុខរបរកសិកម្មជាចំបង(មុខរបរផលិតកម្មដាំដុះ ចិញ្ចឹមសត្វ និងសិប្បកម្មកសិកម្ម) ។

មាន២ស្រុកដែលមានព្រំប្រទល់ជាប់ប្រទេសឡាវ មានស្រុកសៀមប៉ាង និងស្រុកបុរីអូរស្វាយសែនជ័យ។ ខេត្តស្ទឹងត្រែងមានទន្លេចំនួន៤ហូរកាត់ ទន្លេមេគង្គ សេកុង សេសាន ស្រែពក ដែលជាប្រភពធនធានធម្មជាតិសម្បូរបែប ប្រភពទឹកប្រើប្រាស់ និងធ្វើវិស័យកសិកម្មជាមូលដ្ឋានតំបន់អេកូទេសចរណ៍ ហើយក៏ជាជម្រកសម្រាប់ពងត្រីរបស់ត្រីមេពូជ ជាតំបន់ផ្តល់ជីវិតនៃប្រព័ន្ធជីវចម្រុះទាំងឡាយ​ និងជាអាងស្តុកធនធានមច្ឆាជាតិដ៏សំខាន់សម្រាប់រួមចំណែកឆ្លើយតបទៅនឹងបញ្ហាសន្តិសុខស្បៀង។ ជាមធ្យមប្រមូលផលនេសាទបានប្រមាណជា ៥ ០០០តោនក្នុងមួយឆ្នាំ។

          សណ្ឋានដីខេត្តស្ទឹងត្រែងជាតំបន់ខ្ពង់រាប តំបន់ព្រៃភ្នំ ស្ទឹង ទន្លេ បឹងបួរ អូរ និងដីកោះជាច្រើនកន្លែងជាបណ្តុំនៃប្រព័ន្ធអេកូឡូស៊ី ជីវចម្រុះ និងជាតំបន់ការពារធម្មជាតិជាច្រើនដូចជា ឧទ្យានជាតិវីរៈជ័យ ឧទ្យានជាតិវ៉ើនសៃ-សៀមប៉ាង តំបន់រាមសារ ដែលជាប្រភពជម្រកសត្វ (ព្រៃឡង់)​ និងជាជម្រកសត្វព្រៃសៀមប៉ាង។

ស្ទឹងត្រែងមានទំនប់វារីអគ្គិសនីមួយកន្លែង គឺទំនប់វារីអគ្គិសនីសេសានក្រោមII ដែលមានអនុភាព៤០០មេកាវ៉ាត់។​ ខេត្តនេះមានស្ពានឆ្លងកាត់ទន្លេ០៤កន្លែង​ និងមានផ្លូវជាតិសម្រាប់ការធ្វើដំណើរតភ្ជាប់ទៅកាន់រាជធានីភ្នំពេញ និងតាមបណ្តាខេត្តនានា និងទៅកាន់បណ្តាប្រទេសជិតខាង។

         ការអភិវឌ្ឍន៍វិស័យកសិកម្ម គឺជាគន្លឹះអាទិភាពចំបងមួយដែលជម្រុញសេដ្ឋកិច្ចជាតិ ឆ្ពោះទៅរកភាពរីកចម្រើននិងស្ថានភាពគ្រប់គ្រាន់លើផលិតកម្មកសិកម្ម ឈានទៅលើកស្ទួយកម្រិតជីវភាពរស់នៅរបស់ប្រជាជន ។ដំណើរការនៃការអភិវឌ្ឍន៍វិស័យកសិកម្ម គឺមិនត្រឹមតែលើកស្ទួយការអភិវឌ្ឍន៍ក្នុងវិស័យដើម្បីជម្រុញការបង្កើនស្បៀងអាហារ និងជីវភាពប្រជាជនប៉ុណ្ណោះទេ គឺថែមទាំងផ្តោតការយកចិត្តទុកដាក់ផងដែរទៅលើការគ្រប់គ្រង និងអភិរក្សធនធានធម្មជាតិដែលអាចផ្តល់នូវអត្ថប្រយោជន៍ យ៉ាងច្រើនដល់សង្គមប្រកបដោយនិរន្តភាព និងកំណើនសេដ្ឋកិច្ចជាតិ ។

          បច្ចុប្បន្នផលិតកម្មកសិកម្មប្រទេសកម្ពុជាយើង ក៏ដូចជានៅក្នុងខេត្ត នៅមានកម្រិតនៅឡើយដែលជាហេតុធ្វើឲ្យការផលិតទទួលបានទិន្នផលទាប និងបរិមាណផលិតផលមិនទាន់ឆ្លើយតបតាមតម្រូវការទីផ្សារ ។ ម្យ៉ាងវិញទៀតអាស្រ័យដោយកំណើនប្រជាជនរបស់យើងមានការកើនឡើងយ៉ាងឆាប់រហ័ស ដែលជាហេតុធ្វើឲ្យការផ្គត់ផ្គង់ មិនឆ្លើយតបទៅតាមតម្រូបការ ។

តួនាទីនិងភារកិច្ចមន្ទីរកសិកម្ម រុក្ខាប្រមាញ់ និងនេសាទ

    មន្ទីរកសិកម្មរាជធានី ខេត្ត ជាអង្គភាពថ្នាក់មូលដ្ឋានរបស់ក្រសួងកសិកម្ម រុក្ខាប្រមាញ់ និងនេសាទ មានបេសកកម្មដឹកនាំ គ្រប់គ្រង និងធ្វើសកម្មភាពវិស័យកសិកម្មនៅក្នុងក្របខ័ណ្ឌរដ្ឋបាលរាជធានី ខេត្ត របស់ខ្លួន

១. មន្ទីរកសិកម្មខេត្តមានមុខងារនិងភារកិច្ចដូចតទៅ ៖

• លើកផែនការដឹកនាំនិងជំរុញការអនុវត្តកិច្ចអភិវឌ្ឍវិស័យកសិកម្មនៅក្នុងរាជធានី ខេត្ត ស្របតាមគោលនយោបាយរបស់ក្រសួងកសិកម្ម  រុក្ខាប្រមាញ់ និងនេសាទ ។
• គ្រប់គ្រងទិន្ន័យកសិកម្មគ្រប់ជំនាញ លើកគម្រោងផែនការនិងវិធានការអភិវឌ្ឍវិស័យកសិកម្ម
• លើកគម្រោងកម្មវិធីចំណូល ចំណាយ តាមដានពីការអនុវត្តនិងប្រមូលចំណូលក្នុងវិស័យកសិកម្មបង់ចូលថវិករដ្ឋ
• គ្រប់គ្រងមន្ត្រីរាជការ ថវិកា ទ្រព្យសម្បត្តិរដ្ឋរបស់មន្ទីរកសិកម្ម ខេត្ត ឲ្យបានត្រឹមត្រូវតាមគោលការណ៍ច្បាប់
• រៀបចំកម្មវិធីបណ្តុះបណ្តាលនិងបំពាក់បំប៉ន ពង្រឹងសម្ថភាពមន្ត្រីបុគ្គលិក
• ផ្សព្វផ្សាយ ជម្រុញ ណែនាំ និងត្រួតពិនិត្យ អនុវត្តបណ្តាវិធានការបច្ចេកទេសក្នងវិស័យកសិកម្មគ្រប់ផ្នែកដល់ការិយាល័យអង្គភាពចំណុះ បណ្តាការិយាល័យកសិកម្មក្រុង ស្រុក ខណ្ឌ និងមណ្ឌលកសិកម្មឃុំ សង្កាត់
• ផ្តល់ការគាំទ្រនិងផ្ទេរបច្ចេកទេសក្នុងវិស័យកសិកម្មគ្រប់ផ្នែក ដល់កសិករនិងដៃគូចូលរួម និងលើកទឹកចិត្តអង្គការវិជ្ជាជីវៈសមាគមនានានិងបង្កើតសហគមន៍អភិវឌ្ឍនានាដែលពាក់ព័ន្ធនឹងវិស័យកសិកម្មដើម្បីកែលម្អផលិតកម្មនិងផលិតភាពក្នុងវិស័យកសិកម្មគ្រប់ផ្នែក
• ចូលរួម សហការក្នុងការអនុវត្ត វិធានការពារ ធនធានធម្មជាតិក្នុងវិស័យកសិកម្មគ្រប់ផ្នែក តាមការកំណត់នយោបាយអភិវឌ្ឍ អភិរក្សរបស់ក្រសួង
• ចាត់ចែងការងារអន្តរាគមន៍ ទប់ស្កាត់​បង្ការ និង​រាយការណ៍សុំយោបល់ជាបន្ទាន់ពីរដ្ឋបាលរាជធានី ខេត្ត និងក្រសួងនូវបណ្តាសមាសភាព ភយន្តរាយ​ គ្រោះធម្មជាតិ ភាពអនាធិបតេយ្យលើវិស័យកសិកម្មគ្រប់ផ្នែកដែលកើតមាន
• ធ្វើជាដៃគូដ៏ល្អនិងមានប្រសិទ្ធភាពក្នុងកិច្ចសហការ និងកិច្ចសហប្រតិបត្តការជាមួយបណ្តាមន្ទីរនានា អង្គការ និងម្ចាស់ជំនួយនានា សម្រាប់ការអភិវឌ្ឍវិស័យកសិកម្មនៅក្នុងខេត្ត រាជធានី
• ទទួលអនុវត្តភារកិច្ចផ្សេងៗទៀតដែលថ្នាក់ដឹកនាំក្រសួងប្រគល់ឲ្យ ។

២. មន្ទីរកសិកម្មរាជធានី ខេត្ត ដឹកនាំដោយប្រធានមួយរូបនិងអមដោយអនុប្រធានមួយចំនួន ជាជំនួយការតាមការចាំបាច់:

ក. ប្រធានមន្ទីរ:

• ទទួលខុសត្រូវដឹកនាំរួម និងមានសិទ្ធិសម្រេចលើរាល់ចរន្តការងារ ឬរាល់បណ្តាលិខិតស្នាម សំណុំឯកសារដែលទាក់ទងក្នុងក្របខ័ណ្ឌ និងភារកិច្ចរបស់មន្ទីរដែលមានចែងក្នុងច្បាប់ និងលិខិតបទដ្ឋានផ្សេងៗ និងរាល់ឯកសារដែលត្រូវផ្ញើជូនក្រសួងកសិកម្ម រុក្ខាប្រមាញ់ និងនេសាទ នាយកដ្ឋាន ពាក់ព័ន្ធ រដ្ឋបាលខេត្ត រដ្ឋបាលក្រុង-ស្រុក និងមន្ទីរអង្គភាពពាក់ព័ន្ធក្នុងខេត្ត
• រាល់បណ្តាសំណុំឯកសារការងារចរន្តក្នុងមន្ទីរ ត្រូវបានចុះហត្ថលេខាដោយប្រធានមន្ទីរតែម្នាក់គត់ លើកលែងតែក្នុងករណីអវត្តមានត្រូវបានផ្ទេរសិទ្ធិ ឬ ប្រគល់សិទ្ធិឱ្យអនុប្រធានរូបណាមួយ ទើបចុះហត្ថលេខាជំនួសបាន។ ការផ្ទេរសិទ្ធិ ឬ ប្រគល់សិទ្ធិត្រូវមានជាលាយលក្ខណ៍អក្សរ។

                  ខ.អនុប្រធានមន្ទីរ :

• ជាជំនួយការឱ្យប្រធានមន្ទីរលើការងារភារកិច្ចដែលបានប្រគល់ឱ្យ ហើយមានសិទ្ធិពិនិត្យ សម្រេច និងទទួលខុសត្រូវក្នុងក្របខ័ណ្ឌសមត្ថកិច្ចរបស់ខ្លួនផ្អែកលើច្បាប់ ឬលិខិតបទដ្ឋានទៅតាមការផ្ទេរសិទ្ធិ ឬ ប្រគល់សិទ្ធិនៅពេលអវត្តមានរបស់ប្រធានមន្ទីរ។
• ធ្វើការដឹកនាំដោយផ្ទាល់លើរាល់ការងាររបស់បណ្តាការិយាល័យ ជំនាញ ការិយាល័យកសិកម្ម ក្រុង­ស្រុក ដែលបានប្រគល់ឱ្យទទួលបន្ទុក ដូចមានចែងក្នុង ប្រការ២ ដោយធ្វើការណែនាំ ដាស់តឿន ក្រើនរំលឹក ត្រួតពិនិត្យលើផ្នែកមុខជំនាញទាំងបច្ចេកទេស គោលការណ៍ និងគោលនយោបាយរបស់ក្រសួងកសិកម្ម រុក្ខាប្រមាញ់ និងនេសាទ ព្រមទាំងពិនិត្យលើការងារពាក់ព័ន្ធនឹងសមត្ថកិច្ច បានប្រគល់ជូន ដើម្បីផ្តល់យោបល់ជូនប្រធានមន្ទីរពិនិត្យ និងសម្រេច។
• ក្នុងករណីការងារ ឬ បញ្ហាដែលមានការពាក់ព័ន្ធការិយាល័យច្រើន អនុប្រធានមន្ទីរត្រូវទំនាក់ ទំនងសួរយោបល់គ្នា ដើម្បីបានជាយោបល់ ឬពិភាក្សារកដំណោះស្រាយមុននឹងដាក់ជូន ប្រធានមន្ទីរសម្រេច។
• រាល់ការចុះបំពេញបេសកកម្ម ឬចូលរួមប្រជុំ ឬជួបពិភាក្សាជាមួយប្រតិភូ ឬភ្ញៀវ អនុប្រធានមន្ទីរដែលចូលរួមប្រជុំ ឬជួបពិភាក្សានោះ ត្រូវធ្វើកំណត់ហេតុ ឬរបាយការណ៍ជាលាយលក្ខ័អក្សរជូន ប្រធានមន្ទីរជ្រាប និងដើម្បីតាមដានការងារបន្ត។
• ទទួលខុសត្រូវភារកិច្ចផ្សេងៗទៀតក្នុងករណីចាំបាច់តាមការប្រគល់សិទ្ធិរបស់ប្រធានមន្ទីរ ។

៣. មន្ទីរកសិកម្មខេត្ត មានរចនាសម្ព័ន្ធដូចតទៅ៖

១.ការិយាល័យរដ្ឋបាល បុគ្គលិក

២.ការិល័យផែនការ គណនេយ្យ

៣.ការិយាល័យនីតិកម្មកកសិកម្ម

៤.ការិយាល័យផលិតកម្ម និងបសុព្យាបាល

៥.ការិយាល័យក្សេត្រសាស្ត្រ និងផលិតភាពកសិកម្ម

៦.ការិយាល័យផ្សព្វផ្សាយកសិកម្ម

៧.ការិយាល័យគ្រឿងយន្តកសិកម្ម

៨.ការិយាល័យអភិវឌ្ឍន៍សហគមន៍កសិកម្ម

៩.ការិយាល័យកសិឧស្សាហកម្ម

១០.ការិយាល័យកៅស៊ូ ។

1. ការិយាល័យនិងអង្គភាពនីមួយៗចំណុះឲ្យមន្ទីរ ដឹកនាំដោយប្រធានមួយរូបនិងអមដោយអនុប្រធានមួយចំនួនជាជំនួយការតាមការចាំបាច់ ។
2. ការិយាល័យនីមួយៗ ត្រូវចែកចញជាផ្នែកផ្សេងៗ។ការបង្កើតផ្នែចំណុះការិយាល័យ និងអង្គភាពចំណុះមន្ទីរនិងភារកិច្ចរបស់ផ្នែកនីមួយៗ​ ត្រូវកំណត់សម្រេចដោយប្រធានមន្ទីរកសិកម្មរាជធានីខេត្ត ។

ក្នុងករណីចាំបាច់ មន្ទីរកសិកម្មរាជធានី ខេត្ត អាចបង្កើតនិងកំណត់តួនាទីមណ្ឌលកសិកម្មឃុំ សង្កាត់ ការបង្កើតមណ្ឌលកសិកម្មឃុំ សង្កាត់ ត្រូវកំណត់សេចក្តីសម្រេចរបស់ប្រធានមន្ទីរកសិកម្មរាជធានីខេត្ត ។